Նախագծերը Քոլեջում

1/10/2023, 5:01:00 PM Created By` Տաթև Բլեյան

Ուսանողներ

Ուսումնական նախագծերը որոշվում են կրթահամալիրի ուսումնական օրացույցով, ուսանողների նախասիրությունների զարգացման ակումբների, կրթական ծրագրերի ուսումնական պլաններով որոշված դասընթացների, լրացուցիչ կրթական ծրագրերով, հեղինակային կրթական ծրագրերի պետական աջակցության պայմանագրի հավելվածով, անհատական նախաձեռնությամբ։

Ուսումնական նախագծերը բաց են, մշակվում և իրականացվում են որպես դասավանդողների և ուսանողների համատեղ ուսումնական աշխատանք։ Ուսումնական նախագծերն իրականացվում են կրթական ծրագրի աշխատակարգով (դասացուցակով) կազմակերպվող ուսումնական պարապմունքների ժամանակ, նախագծային ուսուցում իրականացնող դասավանդողի բլոգում հրապարակված կարգով կամ որպես լրացուցիչ ուսուցում, նախագծի ծրագրով որոշված կարգով և ժամկետներում։

Ուսանողների նախագծերը հրապարակված են բլոգներում։

Ուսումնական նախագիծը «Մխիթար Սեբաստացի» կրթահամալիրի քոլեջի ուսանողի համար հանդիսանում է ուսումնական գործընթացի կարևոր բաղադրիչ, որը նպաստում է նրա գիտելիքների և հմտությունների բազմազան զարգացմանը։ Ուսումնական նախագիծը ուսանողներին հնարավորություն է տալիս իրական կյանքում հանդիպող հիմնախնդիրների ձևակերպման և դրանց լուծման միջոցով զարգացնել իրենց հետազոտական և համագործակցային հմտությունները: Այս նախագծերի հիմնական նպատակը ուսումնական պրոցեսի հարստացումն ու ուսանողների ինքնուրույն գործունեության խթանումն է:

Ուսումնական նախագծերի առանձնահատկությունները

Հիմնախնդիր՝ ուսումնական նախագիծը սկսվում է իրական կյանքում հանդիպող հիմնախնդիրի ձևակերպմամբ: Սա կարող է լինել կրթական, սոցիալական, գիտական կամ որևէ այլ բնագավառում առկա խնդիր:
Նպատակ և վերջնարդյունքներ՝ նախագիծը պետք է ունենա հստակ նպատակներ և տեսանելի, շոշափելի վերջնարդյունքներ, որոնք կարող են ներկայացվել հանրությանը:
Տևողություն՝ նախագծերը կարող են լինել կարճաժամկետ (մինչև մեկ ամիս) կամ երկարաժամկետ (մեկ ամիս և ավելի):
Մասնակիցների քանակ՝ նախագծերը կարող են իրականացվել անհատական կամ խմբային ձևաչափով:
Բովանդակություն՝ նախագծերը կարող են վերաբերել որևէ առարկային, լինել միջառարկայական կամ ինտեգրված:

Նախագծերի իրականացման փուլեր

Նախապատրաստական փուլ՝ աշխատանքային խմբերի ձևավորում, աշխատանքի բաշխում և նկարագրություն ըստ խմբերի:
Ընթացք՝ նախագծի ընթացքը նկարագրվում է ըստ քայլերի և առջև դրված խնդիրների: Աշխատանքի ընթացքի լուսաբանում (բլոգներ, լուսանկարներ, ֆիլմեր և այլն):
Վերջնարդյունք՝ վերջնարդյունքը կարող է լինել հանրային ներկայացում (կլոր սեղան, ցուցադրություն և այլն):
Արդյունքների հրապարակում բլոգում, հոդվածներ, հետազոտական աշխատանքներ:
Ստեղծված արդյունքի ցուցադրություն-ներկայացում-համեմատում-նորարարություն-նախագծի հետագա շարունակություն-զարգացում:

Նախագծերի լուսաբանում

Նախագծերի ընթացքի լուսաբանումը և արդյունքները հրապարակվում են ուսումնական անհատական և խմբային բլոգներում, դպրոցների ենթակայքերում, ինչպես նաև՝ mskh.am-ում:
Քոլեջի ուսանողը և դաստիարակը բլոգում ունենում են տվյալ ուսումնական տարվա նախագիծ բաժինը, որտեղ երևում է նախագծի ընթացքը և վերջնարդյունքը (ֆիլմեր, ուղիղ եթերներ, լուսանկարներ, ռադիոնյութեր և այլն):

Նախագծերի մշակում և քննարկում

Նախագծերը մշակում և քննարկում են «Մխիթար Սեբաստացի» կրթահամալիրի քոլեջի նախադպրոցական բաժնի ուսանողները՝ դաստիարակների հետ համատեղ:
Նախագծերը անընդհատ նորացվում են, թարմացվում և ունեն շարունակական բնույթ:
Կազմակերպվում են սեմինար-հավաքներ ծնողների հետ՝ քննարկելու նախագծերի լավարկման հարցերը:
Նախագծերում ներառվում են յուրաքանչյուր տարվա ամփոփումները՝ լրացումներով, որոնք իրականացվել են ուսանողների և դաստիարակների համատեղ աշխատանքի արդյունքում:

Ամփոփում

Ուսումնական նախագիծը կարևոր միջոց է ուսանողների ինքնուրույն և համագործակցային հմտությունների զարգացման համար: Այն ոչ միայն նպաստում է նրանց գիտելիքների հարստացմանը, այլև խթանում է նրանց ստեղծագործական և հետազոտական մտածողությունը:

2023-2024 ուսումնական տարի

Քոլեջի նախադպրոցական բաժնի ուսանողների փաթեթներ. 2, 3-րդ կուրս

Նախագծերի փաթեթ
2020-2024ուստարի

Վեբ ծրագրավորման, համակագչային գրաֆիկայի ոլորտի մասնագիտական նախագծերը կազմել և իրականացրել են Քոլեջի ուսանողները։ Նախագծերը հրապարակված են ուսանողների բլոգներում։