Մասնաժողով

Կրթահամալիրի մասնաժողովի (այսուհետ` մասնաժողով) գործունեությունը որոշված է «Երևանի «Մխիթար Սեբաստացի» կրթահամալիր» ՊՈԱԿ-ի կանոնադրությամբ (կետ 23, 27, 48)։  

Մասնաժողովը կրթահամալիրի մանկավարժական, ուսումնամեթոդական, հետազոտական գործունեությունը պլանավորող, համակարգող և կարգավորող կոլեգիալ մարմին է: Կրթահամալիրի մասնախմբերի, ուսումնական կենտրոնների ղեկավարները ձևավորում են կրթահամալիրի մասնաժողովը (այսուհետ՝ մասնաժողով):  

Մասնաժողովի անհատական կազմը և փոփոխությունները կրթահամալիրի տնօրենի ներկայացմամբ հաստատում է կրթահամալիրի խորհուրդը; 

 Մասնաժողովը ղեկավարում է կրթահամալիրի փոխտնօրենը: Մասնաժողովն իր աշխատանքը կազմակերպում է նիստերի միջոցով:  Մասնաժողովի նիստերը, որպես կանոն, կազմակերպվում են յուրաքանչյուր ամսվա վերջին երեքշաբթին։ Կրթահամալիրի տնօրենի առաջարկով կարող է կազմակերպվել մասնաժողովի արտահերթ նիստ։ Մասնաժողովի նիստերը կարող են անցկացվել  առցանց: Մասնաժողովին ներկայացվող նյութերը պատրաստվում են հեռավար, առցանց քննարկումների միջոցով: Մասնաժողովն իր որոշումները ընդունում է համաձայնությամբ։  

Մասնաժողովը սահմանված կարգով կրթահամալիրի խորհրդի հաստատմանն է ներկայացնում․  

• կրթահամալիրի կրթական հայեցակարգը. 
• մասնաճյուղերի ուսումնական պլանները՝ ըստ ուսումնական շրջանների, ուսումնական պլանը սպասարկող կարգերի. 
• առարկայական ծրագրերը, այդ թվում՝ սովորողի ընտրությամբ գործունեության և դասընթացների, լրացուցիչ կրթության. 
• ուսումնական ձեռնարկների և մեթոդական ուղեցույցների ցանկը. 
• կրթահամալիրում իրագործվող ծրագրերը, հետազոտական և մեթոդական աշխատանքների թեմաները. 
• կրթահամալիրի խորհրդի կողմից նախարարությանը ներկայացվող կրթահամալիրի գործունեության առարկային, նպատակներին և խնդիրներին համապատասխան առաջարկություններ։ 

Մասնաժողովը հաստատում է՝ հեղինակային կրթական ծրագրերի ուսումնական պլաններով որոշված՝  ուսումնական ստուգատեսային-նախագծային ճամբարների՝ երկրորդ, չորրորդ շրջանների կազմակերպման կարգը, լրացուցիչ կրթության դասընթացների ցանկը, կազմակերպման կարգը, այլ հարցեր։ 

Մասնաժողովն ունի իր էջը մանկավարժության կենտրոնի բլոգում, տարածման էլեկտրոնային հասցեն՝masnajhoghov@mskh.am: 

Մասնաժողովի անդամը․ 

• մասնակցում է մասնաժողովի նիստերին, նաև՝ առցանց  
• ծանոթանում է հերթական նիստի օրակարգի նախագծին և երեք աշխատանքային օրվա ընթացքում մասնաժողովին (վերևում բերված հասցեով) ներկայացնում է իր առաջարկները կամ համաձայնությունը (չարձագանքելը համաձայնության նշան չէ) 
• ծանոթանում է նիստին ներկայացված նյութերին և նիստից հետո մեկ շաբաթվա ընթացքում  ներկայացնում է իր դիտարկումները։ 

Մասնաժողովի ղեկավարը․ 

• մասնաժողովի նիստից 10 աշխատանքային օր առաջ հրապարակում է հերթական նիստի օրակարգի նախագիծը. 
• մասնաժողովի անդամներից ստացած հիմնավորված առաջարկները ներառում է նիստի օրակարգում և հրապարակում է նիստի օրակարգը. 
• մասնաժողովում հարց ներկայացնողներին, մասնաժողովի անդամներից բացի, տեղեկացնում է նիստի մասին. 
• վարում է մասնաժողովի նիստը. 
• մասնաժողովի որոշումները ներկայացնում է կրթահամալիրի տնօրենի հաստատմանը. 
• կրթահամալիրի կանոնադրությամբ որոշված փաստաթղթերը ներկայացնում է կրթահամալիրի կառավարման խորհրդում։ 

Մասնաժողովի նիստները բաց են։ Կրթահամալիրի տնօրենը, հիմնադիր տնօրենը, մասնաճյուղերի ղեկավարները մասնաժողովի նիստին մասնակցում են ի պաշտոնե։ Օրակարգում ընդգրկված հարցը (ծրագիր, նախագիծ, առաջարկություն, հաշվետվություն և այլ) ներկայացնողների մասնակցությունը պարտադիր է։ Նիստին կարող են հրավիրվել այլ մարդիկ։ 

Մասնաժողովի անհատական կազմը՝ այստեղ։